Yara na sa stable nga kondisyon ang duha ka suldado kag tatlo ka sibilyan nga napilasan sa grenade attack nga nagluntad sa Barangay Mother Patuan, Shariff Aguak, Maguindanao del Sur.
Sa interview sang Bombo Radyo Koronadal, ginpahayag ni Lt.Col. Ronald Suscano, spokesperson sang 6th Infantry Division (6ID) Philipine Army, nga padayon nga ginamonitor sang mga otoridad ang kahimtangan sang mga biktima samtang nagapadayon man ang imbestigasyon sa insidente.
Base sa inisyal nga impormasyon, duha ka wala pa makilala nga lalaki nga sakay sang itom nga motorsiklo ang naghaboy sang granada sa isa ka military vehicle samtang nagalabay ini sa atubangan sang merkado antes nagpalagyo pakadto sa direksyon sang Mamasapano.
Suno kay Suscano, wala pa sang igo nga ebidensiya agud masiling kun ang mga responsable may kaangtanan sa isa ka armado nga grupo ukon ginbayaran lamang para himuon ang pag-atake.
Samtang, padayon ang koordinasyon sang militar kag Philippine National Police sa pagpangita sa mga suspetsado, samtang ginapabakod man ang seguridad sa pipila ka mga lugar sa Maguindanao del Sur bilang kabahin sang preparasyon para sa Bangsamoro Parliamentary Elections.
