Apat na lalaki na nahaharap sa mga kasong may kaugnayan sa umano’y maanomalyang flood control projects sa Bulacan ang naaresto ng mga awtoridad matapos maisilbi sa kanila ang mga warrant of arrest, ayon sa Philippine National Police (PNP).
Sa pahayag ng PNP, ang mga suspek ay kinasuhan ng malversation of public funds or property through falsification of public documents dahil sa umano’y iregularidad sa pagpapatupad ng ilang flood control projects sa lalawigan. Tatlo sa mga akusado, na may edad 51, 41, at 40, ay inabutan ng mga operatiba habang nakapiit na sa isang detention facility sa Quezon City, habang ang isa pang 63-anyos na suspek mula sa Bustos, Bulacan ay kusang-loob na sumuko matapos ang isinagawang tracking operations.
Nilinaw ng PNP na walang inirekomendang piyansa para sa mga kasong kinahaharap ng mga akusado, na nagpapakita ng bigat ng mga isinampang reklamo laban sa kanila.
Ang mga pag-aresto ay kasunod ng paglalabas ng warrant of arrest ng Malolos Regional Trial Court laban sa mag-asawang kontratista na sina Pacifico “Curlee” Discaya at Cezarah “Sarah” Discaya, kasama ang siyam pang indibidwal na umano’y sangkot sa isang kickback scheme kaugnay ng mga flood control project.
Isang araw bago nito, naghain ang Office of the Ombudsman ng mga kasong malversation at graft laban sa mag-asawang Discaya at iba pang akusado, kabilang sina Merg Jaron Laus, Brice Ericson Hernandez, Jaypee Mendoza, Ernesto Galang, Norberto Santos, Lorenzo Pagtalunan, Juanito Coronel Mendoza, Floralyn Simbulan, at Ma. Roma Angeline Rimando.
Pinuri naman ni PNP Chief Jose Melencio Nartatez Jr. ang mga operatibang nagsagawa ng pag-aresto, at binigyang-diin na tungkulin ng kapulisan na tiyaking may pananagutan ang sinumang mapatunayang lumabag sa batas, lalo na kung sangkot ang pondo ng bayan.
Ayon sa PNP, ipinaalam sa lahat ng naarestong suspek ang kanilang mga karapatan alinsunod sa Konstitusyon sa wikang kanilang nauunawaan. Nanatili sila sa kustodiya ng mga awtoridad habang hinihintay ang mga susunod na pagdinig at proseso sa hukuman kaugnay ng kaso.
