Nakit-an ang apat ka barko sang China nga nagasunod sa ginpatigayon nga Maritime Cooperative Activity (MCA) sang Pilipinas kag Estados Unidos sa bahin sang West Philippine Sea, partikular sa palibot sang Bajo de Masinloc.
Ini ang una nga MCA sa amo nga lugar matapos makuha ang Chinese floating structure sa sulod sang bahura nga nangin kontrobersyal bangud sa ginapatihan nga indi legal nga presensya sini.
Suno sa Armed Forces of the Philippines (AFP), lakip sa mga barko sang China ang duha ka Jiangkai-class frigates, isa ka Jiangdao-class corvette, kag isa ka auxiliary tanker. May isa man ka Chinese maritime patrol aircraft nga naglupad sa ibabaw sang lugar samtang ginapatigayon ang aktibidad.
Bisan pa sa presensya sang mga barko sang China, padayon nga natigayon sang AFP kag US forces ang mga ginplano nga aktibidad pareho sang search-and-rescue operations, visit-board-search-and-seizure drills, kag division tactics.
Ang MCA kabahin sang mas haluag nga Salaknib 2026 joint military exercise nga gintambungan sang kapin 7,000 ka tropa halin sa Pilipinas, Estados Unidos, Japan, New Zealand, kag Australia.
Suno sa AFP, ang mga aktibidad legal kag suno sa international law, kag kabahin sang pagpatuman sang arbitral ruling sang 2016 nga nagbasura sa malapad nga pag-angkon sang China sa amo nga kadagatan.
