KORONADAL CITY – Gindangat sa balaybululngan ang 3 ka pilason sa nagluntad nga vehicular accident sa bahin sang Purok Marcos, Barangay Rotonda, Koronadal City nga ginainvolbaran sang multicab kag motorsiklo.
Ini ang ginkumpirmar ni PSMS. Gandi Basan, Traffic Investigator sang Koronadal City PNP Traffic Section sa interview sang Bombo Radyo Koronadal.
Ginkilala ni Basan ang mga pilason nga sanday Terrence Salba, 16 years old, male, single, residente sang Sitio Cogonal, Barangay Topland, Koronadal City nga driver sang motorsiklo kag ang mga backrider sini nga sanday Arth John Bulanon, 16 years old, male, single,residente sang Cabugwason, Barangay Topland, Koronadal kag Jaspher Mangalay, 18 years old, male, single kag residente of Barangay Topland, Koronadal City.
Naguwa sa imbestigasyon nga samtang ginasubay sang motorsiklo nga Honda RS125 Motorcycle ang kalabaon sang Provincial Road halin sa direction sang Barangay Esperanza padulong sa Barangay Hall sang Rotonda nasugata sini ang ka unit sang Suzuki Multicab, duag Maroon, nga may plate number MAS 7476 nga ginamaneho ni Alberto Gurra, 22 years old, male, single kag residente sang Upper Mabuhay, Barangay Topland, Koronadal City nga padulong sa opposide direction.
Suno kay Basan, gin-agaw sang Suzuki Multicab linya sang motorsiklo rason nga nagbugguanay ang mga ini.
Sa kabaskog sang impact, nagtabog ang driver kag sakay sang motorsiklo nga gintunaan sang pagkapilas sang mga ini.
Natukiban man nga nakainom ang driver sang multicab nga nangin kabangdanan sang aksidente.
Gilayon naman gindala sa balay-bululngan ang mga pilason samtang ginkustodiya sang mga otoridad ang driver sang multicab.
Liwat naman nga nagpaalinton ang mga otoridad sang mga motorista nga maghalong sa pagmaneho sang salakyan kag likawan gid ang pag-inom sang makahulubog nga ilimnon agud malikawan ang disgrasya sa dalanon.
