KORONADAL CITY – Ginkumpirmar sang Department of Health ukon DOH 12 nga naka quarantine na sa karon sa isa ka ospital sa Cotabato city ang tatlo ka bulan nga lapsag nga ginapatihan apektado sang balatian nga polio.
Suno kay Department of Health ukon DOH 12 Information Officer Jenny Panizalez, yara sa isolation room sang Cotabato Regional Medical Center ang nasambit nga lapsag nga nakita-an sang mga sintomas sang polio kasubong sang pabalik-balik nga hilanat kag pagka-paralyze sang isa ka tiil sini.
Padayon man nila nga ginamonitor ang kahimtangan sang lapsag agud nga makumpirmar kun ang pasyente ang mangin panibag-o nga kaso sang mga apektado sang polio sa Pilipinas.
Sa karon, maidid nga ginasekyar ang kahimtangan sang pasyente kag ginahulat pa ang resulta sang mga laboratory test.
Samtang, panawagan man sini sa publiko nga ipabalin nga tinlo ang lawas kag palibot..
Ginlayagayan man sini ang mga ginikanan nga indi mahadlok sa pagpabakuna sa ila nga kabataan edad 5 ka tuig panubo batuk sa polio bangud luwas ini kag epektibo.
