KORONADAL CITY – Ginbawian sang kabuhi ang isa ka 22-anyos nga motorista matapos mabunggo ang ginamaneho nga motorsiklo sa likod nga bahin sang isa ka 10-wheeler truck sa Purok 7, Barangay Crossing Rubber, sa atubangan lamang sang Southeast Asian Institute of Technology ukon SEAIT alas-6:50 sang Lunes sa gab-i, Setyembre 22, 2025.
Ginkilala sang mga otoridad ang biktima nga si Steve Tambod, nga residente sang Sitio Acfaon, Barangay Bunao sa nasambit nga banwa.
Naguwa sa imbestigasyon sang Tupi PNP nga madasig ang dalagan sang Raider motorcycle nga ginamaneho ni Tambod kun diin pag-abot sa lugar nabungguan sini ang ginasundan nga truck nga padulong sa General Santos City.
Gilayon nga nadala sa hospital ang motorista apang gindeklarar na ini nga dead on arrival sang mga doktor.
Samtang, nagsungka naman sa kapulisan ang drayber sang truck nga ginkilala kay Victor, 49-anyos, nga residente sang Midsayap, Cotabato.
Sa karon, nagapabilin sa kustodiya sang Tupi PNP ang drayber sang truck kag ang salakyan sini subong man ang motorsiklo sang napatay nga biktima.
