Nangin mas masadya kag mas exciting ang selebrasyon sang Cooperative Month subong nga Oktubre sa syudad sang Koronadal, matapos nga nangin kabahin ang mga kooperatiba sa nagkalain-lain nga aktibidad para sa Charter Anniversary kag Negosyo Festival.
Sa interview sang Bombo Radyo Koronadal, ginpahayag ni Jonathan B. Enmanuel, City Cooperative Officer sang Koronadal, nga nangin oportunidad ang mga nasambit nga selebrasyon agud mapalapnag ang kaangtanan kag partisipasyon sang mga kooperatiba sa komunidad.
Suno kay Enmanuel, nagpatigayon ang ila talatapan sang nagkalain-lain nga programa kag aktibidad nga naghatag sang dugang nga kahigayunan para mapakilala ang papel sang mga kooperatiba sa pagpauswag sang pangabuhi kag ekonomiya sang mga pumuluyo.
Lakip sa mga aktibidad ang caravan bilang pagsugod sang selebrasyon, pagpakigbahin sa business mindset seminar bilang suporta sa Charter Anniversary, kag interschool competition sa TV kag radio broadcasting nga ginpartisiparan sang mga eskwelahan sa bug-os nga SOCKSARGEN.
Dugang pa ni Enmanuel, paagi sa broadcasting competition, luyag man sang ila talatapan nga mapahibalo ang publiko nga ang kooperatiba indi lamang para sa mga adulto ukon tigulang, kundi may importante man nga papel sa pag-edukar kag paghatag sang oportunidad sa mga pamatan-on.
Samtang, ginpahayag niya nga nagapadayon ang selebrasyon sang Cooperative Month sa bilog nga bulan sang Oktubre, bisan pa nga natapos na ang Charter Anniversary sang Koronadal.
Ginalauman nga paagi sa padayon nga mga programa, mas madamo pa nga pumuluyo, ilabi na ang mga kabataan, ang makahangop sa benepisyo sang kooperatiba kag sa papel sini sa pagpauswag sang komunidad.
