Gin-anunsyo sang World Health Organization (WHO) ang isa ka makasaysayan nga tikang batok sa Malaria matapos gin-aprubahan ang una nga bulong partikular para sa mga lapsag nga nagabug-at sang duha tubtob lima ka kilo.
Ang bag-o nga pormulasyon sang artemether-lumefantrine nakapasar sa internasyonal nga mga sulundan sang kalidad, kaluwasan, kag pagkaepektibo, kag ginapaabot nga mapasangkad ang pag-angkon sang luwas nga pagbulong para sa mga bag-ong bun-ag sa Africa.
Sang una, ang mga lapsag ginabulong paagi sa isa ka bulong nga gintuyo para sa mas magulang nga kabataan, nga nagahatag sing katalagman sang sayop nga dosis kag pagkamakahililo.
Sa amo man nga tion, ang WHO nag-prequalify man sang tatlo ka bag-o nga rapid diagnostic tests nga makatukib sang mga parasito sang malaria bisan pa nga ang HRP2 gene wala, nga sang una nagtuga sang sayop nga negatibo nga mga resulta.
Suno sa WHO, ang bag-o nga mga test ang makabulig sa pagtapna sang delay sa pagbulong kag kamatayon sa mga pungsod nga may mataas nga kaso sang malaria.
Suno sa World Malaria Report 2025, may ginabanta nga 282 milyones ka kaso kag 610,000 ka napatay sa 2024, mas mataas sangsa nagligad nga tuig.
Apisar pa sang mga hangkat sang pagbato kag kakulang sang pondo, kapin sa 2.3 bilyones ka mga impeksyon ang nalikawan kag 14 milyones ka kabuhi ang naluwas halin sang 2000.
Ang WHO nagsiling nga ang bag-o nga mga bulong, bakuna, kag mga pagtilaw sa pagdiagnose nagapamatuod nga ang pagtapos sang malaria posible paagi sa tayuyon nga suporta kag pondo.
