KORONADAL CITY- Amat-amat na suno pa nga nagbalik sa ila tagsa-tagsa ka puluy-an ang ginatos ka mga residente nga nagbakwit makaligad ang nagluntad nga engkwentro sa tunga sang 2 ka MILF commanders sa Sultan sa Barongis, Maguindanao.
Sa interbyu sang Bombo Radyo Koronadal kay Coordinating Committee on the Cessation of Hostilities (CCCH), Ad Hoc Joint Action Group (AHJAG) officer Benhod Solaiman, ginpahayag sini nga ginatutukan nila ang mga residente sa luar kag nagpatunga sa 2 ka grupo agud nga mag-negosasyon sa tinutuyo nga indi na maglala pa ang away.
Suno kay Solaiman, padayon nga naga-assist ang mga suldado halin sa 33rd IB Philippine Army sa mga bakwit nga na-trauma sa nagluntad nga engkwentro.
Aminado si Solaiman nga ang ginapahayag nga rason sang away sang mga ini ang indi pag-intindihanay sa pagtunga sa pagpangotong.
Kadungan sini, nagpanawagan si Solaiman sa mga pumuluyo nga makig-angot sa mga otoridad agud nga mapabilin ang kalinong sa nasambit nga lugar.
Samtang, ginpaidalom na sa stress debriefing ang mga apektado nga pamilya.
