KORONADAL CITY – Ginpasiguro sang GPH-MILF Ceasefire Committee nga nakatutok sila sa natabo nga engkwentro sa tunga sang duha ka armado nga pamilya sa banwa sang Carmen, North Cotabato nga nagresulta sa pagkapatay sang 6 katawo kag pagkapilas naman sang iban pa.
Sa interbyu sang Bombo Radyo Koronadal kay North Cotabato Police Provincial Director Police Senior Supt. Emmanuel Peralta, madugay na nga nagaaway ang pamilya Matalam kag Cua sa Barangay General Luna sa nasambit nga banwa bangud sa ginaagawan nga duta.
Suno kay Peralta, nagdugay sang halos 3 oras kaina sang aga ang engkwentro nga nagresulta sa pagbakwit sang pila ka mga residente nga nagapabilin subong sa luwas nga lugar kag wala pa makabalik sa ila nga puluy-an.
Madumduman nga naghingyo sang bulig ang pamilya Cua sa grupo ni Kumander Kalawan kag Kusain Akmad sang MILF samtang sa MNLF naman ang pamilya Matalam.
Sa subong nagapabilin sa lugar ang mga katapu sang 602nd Brigade Philippine Army kag pulisya agud masiguro nga indi na liwat nga matabo ang pagkambyuhanay sang lupok.
Nagpromisa naman ang LGU-Carmen nga sapulon ang duha ka pamilya agud nga indi na liwat nga matabo ang engkwentro.
Samtang, ang mga napatay sa engkwentro ang ginalakipan nanday Ustadz Odin Bala,Mesi Bala kag King Kabambalan,mga tinawo ni Kumander Kusain Akmad kag Kumander Kalawan kag sanday Zukarno Maguid,Lawan Lakman kag Makungan Lakman,mga tinawo ni Arlyn Matalam.
