KORONADAL CITY – Mahimo na maagyan sag mga motorsiklo ang temporaryo nga dalan sa naguba nga tulay sa Barangay New Dumangas, T’boli, South Cotabato, matapos ini tambakan sang lokal nga gobyerno upod sa mga opisyal sang barangay.
Suno kay Barangay Chairman Dante Tidula Sr., limestone na lang ang kulang agud mas mapabakod ang temporaryo nga agyanan kag masiguro ang luwas nga pagbyahe sang mga motorsiklo kag iban pa nga mga salakyan.
Ginpahayag ni Tidula nga ang temporaryo nga alagyan magaserbe anay samtang ginahulat ang pagpadayon sang konstruksyon sang permanente nga taytay, nga ginapaabot mapondohan sang Department of Public Works and Highways (DPWH) sa tuig 2027.
Madumduman nga nauna na nga ginpahayag ni Kap Tidula sa interview sang Bombo Radyo Koronadal nga antes natapos ang temporaryo nga agyanan, naglab-ot sa ₱150 kada biyahe ukon ₱300 kada adlaw ang dugang nga gasto sang mga residente nga napilitan mag-agi sa mas malayo nga ruta bangud sang pagkaguba sang taytay sa Zigzag Road.
