Ginpasaka ang tsunami warning sa siyam ka probinsiya sa Mindanao matapos ang mabaskog nga magnitude 7.8 nga linog nga nag-uyog sa Sarangani sang aga sang Lunes, Hunyo 8, nga nagtuga sang kahadlok kag alert sa mga baybayon nga komunidad.
Sa ginpagwa nga localized tsunami warning sang Philippine Institute of Volcanology and Seismology (PHIVOLCS), ginpahayag nga posible may mag-abot nga mga balod nga masobra isa ka metro ang kataason nga makaigo sa mga coastal areas ukon baybayon.
Suno sa ahensya, ang amo nga kondisyon mahimo magpadayon sulod sang pila ka oras depende sa asod-asod nga aftershocks kag paghulag sang dagat matapos ang pagtya-og.
Lakip sa mga probinsiya nga ginpaandaman sang tsunami warning amo ang Sarangani, Davao Occidental, South Cotabato, Sultan Kudarat, Zamboanga del Sur, Zamboanga Sibugay, Basilan, Sulu, kag Tawi-Tawi, nga tanan may coastal areas nga posible nga maapektuhan.
Ginapahanumdom sang mga awtoridad sa mga residente nga nagaestar sa baybayon nga gilayon maglikaw kag magbakwit sa mas mataas nga lugar.
Ginahingyo man nga magpabilin nga alerto kag magpati sa opisyal nga anunsyo sang gobyerno samtang nagapadayon ang monitoring sa sitwasyon sa dagat kag sa mga apektado nga lugar.
