Nagpahayag sang kabalaka ang isa ka tricycle driver sa Koronadal City bangud sa ginalauman nga panibag-o nga pagsaka sang presyo sang gatong sa masunod nga semana.
Sa interview sang Bombo Radyo Koronadal kay Ejay Gaya, nagabug-at na ang ila pangabuhi bangud sa padayon nga pagsaka sang presyo sang mga batakan nga balraklon.
Ginpahayag niya nga indi na igo ang ila kita sa pagpamasada, labi na nga may ginapaskwela pa siya nga estudyante.
Bangud sini, nagapanawagan siya sang pagrepaso sa pamasahe agud makabulig sa ila adlaw-adlaw nga panginahanglanon.
Ginalauman man ni Gaya nga matalakay sa State of the Nation Address ni Pangulong Ferdinand Marcos Jr. ang mga problema sa inflation, pagsaka sang presyo sang baraklon, kag pagpaayo sang sweldo sang mga mamumugon.
Dugang niya, kinahanglan sang mas dugay nga solusyon kag mas madasig nga aksyon sang gobyerno agud masolusyunan ang nagapadayon nga kabudlayan sang mga Pilipino, labi na sa sektor sang pangabuhian.
