Hindi na igigiit ng House prosecution ang pagharap sa witness stand ni Edward Fajarda, dating special disbursing officer ng Department of Education, matapos tanggapin ng depensa ang karamihan sa mga facts na nais sana nitong patunayan sa pamamagitan ng kanyang testimonya.
Ayon kay lead prosecutor Rep. Gerville “Jinky Bitrics” Luistro, naging sapat ang mga napagkasunduang facts upang maisama sa rekord ng impeachment trial ang mahahalagang impormasyong may kaugnayan sa paghawak ni Fajarda sa confidential funds ng DepEd.
Kabilang sa mga tinanggap ng depensa ang mga dokumentong may kaugnayan sa kanyang paghawak ng pondo, gayundin ang pag-encash ng tatlong tseke na tig-P37.5 milyon noong 2023.
Kasama rin sa stipulations ang mga certification at report na may lagda ni Vice President Sara Duterte.
Gayunman, nananatiling hindi pagkakasunduan ng dalawang panig ang eksaktong terminong gagamitin sa paglalarawan sa pagbibigay ni Fajarda ng pera kay security officer Col. Dennis Nolasco—kung ito ba ay isang “transfer” o “disbursement.”
Ayon naman kay prosecutor Rep. Joel Chua, halos lahat ng impormasyong nais nilang makuha mula kay Fajarda ay naisama na sa mga facts na tinanggap ng depensa.
Hindi na rin igigiit ng prosecution ang pagharap ni Fajarda dahil kasalukuyan itong nagpapagaling mula sa stroke at iba pang karamdaman.
Sinabi ni Luistro na nakasaad sa medical certificate ni Fajarda na mayroon siyang infarct, hypertension at diabetes at pinayuhang magpahinga ng karagdagang 30 araw.
Dahil dito, binawi ng prosecution ang kahilingan nitong obligahin si Fajarda na humarap sa impeachment trial. Iniutos naman ni presiding officer Senator Francis Escudero ang pagbawi sa subpoena laban sa dating DepEd official.
Binigyang-diin ni Luistro na isinasaalang-alang ng desisyon ang kalagayan ng kalusugan ni Fajarda, habang nananatili naman sa rekord ng paglilitis ang mahahalagang impormasyong nais patunayan ng prosecution sa pamamagitan ng mga napagkasunduang facts.
