Nagpatigayon sang pag-usisa ang lokal nga panguluhan sang Tampakan sa pagkonsumo sang karne sang baboy sa banwa agud makakita sang solusyon sa nagapadayon nga kabudlayan sang mga lokal nga manug-alaga sang baboy.
Sa interview sang Bombo Radyo Koronadal, ginpahayag ni Mayor Leonard T. Escobillo, RN, nga naglab-ot sa 19 ka ulo sang baboy kada adlaw ang ginaihaw kag ginabaligya sa banwa.
Kasunod sini, gintipon sang alkalde ang lokal nga mga hog raiser, manugbaligya sang karne kag mga pumuluyo agud talakayon ang nagakaigo nga presyo nga makabulig sa tanan nga sektor.
Paagi sa ila nga pagbinuligay, nagkasugot sila sa ₱160 kada kilo nga presyo sang liveweight sang baboy, nga suno kay Escobillo, patas para sa mga manug-alaga kag konsumidor.
Ginpahanumdom man sang alkalde nga bisan gamay nga pagdugang sa presyo sang liveweight daku na nga bulig sa mga lokal nga manug-alaga sang baboy, nga nagaatubang sang pagkalugi.
