KORONADAL CITY – Nagapadayon ang estrikto nga checkpoints sang mga awtoridad sa Comelec checkpoint sa Barangay Morales, siyudad sang Koronadal kag iban pa nga mga border Checkpoints sang Probinsya sang South Cotabato.
Ang nasambit nga checkpoint nagtutok sa pagmonitor sang mga public kag private vehicles nga naga sulod sa syudad.
Suno sa report, duha ka motorcycle drivers ang nadakpan bangod sa kakulangan sang dokumento kag wala nagasuksok sang helmet.
Ang checkpoint ginatukod agod makuha ang mga nagalapas sa balaod, partikular na ang gun ban nga ginapatuman para sa sini nga panahon sang eleksyon.
Ini man ang isa sa mga ginsiguro sang pamunuan sang South Cotabato -Highway Patrol Group.
Suno kay PLt. Juanito Paparon- Chief sang South Cotabato -Highway Patrol Group, ang mga kapulisan ang padayon nga nagahimo sang individual inspections sa mga pampubliko kag pribado nga mga salakyan agud mapasiguro nga ang tanan nga nagalabay nagasunod sa mga regulasyon.
Samtang nagapadayon ang operasyon, nagapahinumdom ang mga awtoridad sa publiko nga sundon ang mga balaod para sa kaluwasan kag kaayuhan sang tanan.
Madumduman nga sang nagligad nga bulan, may mga reported cases sang gun ban violators sa mga checkpoint, nga nagpatin-aw sang panginahanglan sang mas estrikto nga monitoring.
