KORONADAL CITY – Ginaduso sa karon sang Provincial Government sang South Cotabato ang pagbulig sa mga local farmers sa probinsya kasunod suno pa sa negatibo nga epekto sang Rice Tarrification Law.
Sa nangin pahayag ni South Cotabato Governor Reynaldo Jun Tamayo Jr, ginpanhayag sini nga ginatun-an nila sa karon kaupod ang Sangguniang Panlalawigan Member ang pag-aprubar sang budget agud nga mabakal sa mas mataas nga presyo ang palay nga ginabaligya sang mga mangunguma sa South Cotabato.
Sa tion suno pa nga matuman ini kaupod ang National Food Authority ukon NFA SoCot, posible nga yara sa P22.00/kilo ang mangin presyo sang palay kag ini suno ang mangin pinakamataas nga bakal sang palay halin sa mga mangunguma sa bug-os nga Pilipinas.
Samtang, nagpalab-ot man sang suporta kag bulig ang pila ka mga negosyante sa probinsya agud nga mas mabuligan ang mga mangunguma kasunod sang kabalaka nga mas manubo pa sa P17.00/KL ang mangin presyo sang palay.
Bangud suno pa sa pagdamo sang import nga bugas, madamo sa mga mangunguma ang naga-angal.
Ginahimuan man suno pa sang paagi sang Provincial Government kaupod ang Office of the Provincial Agriculture nga mahatagan sang Farmer’s Identification Number agud nga indi ma-usar sang mga middleman.
Dugang pa ni Tamayo nga pagtibusok sang rice industry ang isa ka aspeto sa pagdeklarar sang state of emergency.
