Ginmandoan sang Korte Suprema ang Commission on Elections nga magdihon sang special provincial board of canvassers agud madeklarar nga daog nga Kongresista sang 1st District sang South Cotabato kalakip ang Gensan si anay GenSan Vice Mayor Shirlyn Banas Nograles.
Ang kamandoan sang SC ang kasunod sang pagpabor sang mga mahistrado sa petisyon ni Nograles nga ibasura ang resolusyon sang Comelec nga nagsuspinder sang piniliay sa pagka-kongresista sa 1st District sang SoCot kag GenSan sang May 13, 2019.
Nakapagkit man sa Comelec resolution 10524 nga magatalana sang special elections sa 1st kag lone district sang General Santos City sandig sa RA 11243 nga nagaseparar sa Gensan halin sa una nga distrito sang South Cotabato.
Gindeklarar sang SC nga null and void ang resolusyon sang COMELEC bangud sa interpretasyon sang mga mahistrado nga sa Mayo 2022 pa ang madason nga piniliay agud magpili sang separar nga representante para sa lone district sang GenSan kag 1st District sang South Cotabato..// Nangin layi ang RA 11243 sadtong Abril 2019 nga sakop na sang election period..// Madumdoman nga nakakuha sang pinakamataas nga boto si Nograles sang May 13 elections.
Ginsulat ni Justice Rosmari Carandang ang desisyon kag gin-uyonan ini sang 13 nga iban pa nga mahistrado sang korte Suprema magluwas kay Justice Ramon Paul Hernando nga yara sa official business.
