KORONADAL CITY – Yara na sa kustodiya sang kapulisan ang tatlo ka mga suspek nga ginaalegar konektado sa pagpalusot kag pagbaligya sang smuggled cigarettes sa siyudad sang Koronadal.
Ini ang ginkumpirmar ni PLt.Col. Hover Antonio sa interview sang Bombo Radyo Koronadal.
Ginkilala ang mga naaresto nga sanday Warren Manampad, 26-anyos, residente sang Barangay Apopong, General Santos City; Noruhsain Abdul, 29-anyos, residente sang Barangay Soledad, General Santos City kag Mary Ann Delos Reyes, 36 anyos nga residente naman sang Purok Mahusay, Barangay Poblacion,Polomolok, South Cotabato.
Suno kay Antonio, nakabaton sila sang impormasyon nga may salakyan nga pasulod sa siyudad sang Koronadal nga may karga nga mga smuggled cigarettes gani nagpatigayon sila sang operasyon kag nabalagan ang Toyota Vios color metalic gray sa Gensan Drive, Barangay Zone 2, Koronadal City pasado alas-4 kaina sang hapon.
Nakumpiskar sa mga suspek ang yara sa 225 reams sang New Berlin nga made in Indonesia.
Ginahibalo pa sang kapulisan ang kabug-usan nga kantidad sang nakumpiska nga mga sigarilyo.
Kaso nga pagbayolar sa RA10863 ukon Custom Modernization and Tariff Act ang natalana nga ipasaka sa mga naaresto.
Nagapati ang opisyal nga “pasa-pasa” ang mode of operation sang mga suspek sa pagpalusot kag pagbaligya sang illegal nga sigarilyo.
Sa karon, padayon ini nga nagapanawagan sa mga pumuluyo nga e-report gilayon sa ila ang anuman nga mahibaluan nga nagabaligya sang smuggled nga sigarilyo.
.
