KORONADAL CITY – Padayon ang imbestigasyon sang mga otoridad sa natabo nga pagpangluthang-patay sa isa ka safety officer sa Prk. 3, Brgy. Palian, Tupi, South Cotabato, sini nga Martes sang aga, Abril 14.
Sa interview sang Bombo Radyo Koronadal kay Punong Barangay Jeffrey Agustin sang Barangay Palian, ginkilala ang biktima nga si Joesel Tabsing, 63-anyos, residente sang Brgy. Sto. Niño, Koronadal City kag naga-trabaho bilang safety officer sa isa ka construction company nga ginapanag-iyahan sang iya nga utod.
Suno kay Agustin, ginamaneho sang biktima ang iya topdown pakadto sa isa ka meeting sang hinali lang ini nga palapitan kag ginluthang sang riding-in-tandem suspects takna alas-5:42 sang aga.
Nakaangkon ang biktima sang apat ka igo sang bala sa iya likod nga nangin kabangdanan sang iya gilayon nga kamatayon.
Sa pagpangusisa sa crime scene, nakarekober ang mga pulis sang apat ka basiyo sang bala nagikan sa kalibre .45 nga armas.
Dugang pa ni Agustin, sa subong ginahibalo pa ang motibo sa likod sang nasambit nga krimen.
Nagpanawagan man ang opisyal sa mga posible nga nakakita sa insidente nga makigkooperar sa mga otoridad para sa madasig nga pagresolba sang kaso.
Samtang, magapatuman naman sang mas strikto nga pagbantay sa amo nga lugar agud indi na maliwat pa ang sini nga sahi sang bayolente nga insidente.
