KORONADAL CITY– Nagapadayon ang imbestigasyon sang Koronadal City PNP sa panibag-o nga insidente sang pagpangluthang sang riding-in-tadem sa Prk. Malipayon Brgy. Sto. Niño, siyudad sang Koronadal.
Sa inisyal nga impormasyon ang biktima ang kinilala nga si Raymund Puyong yara sa legal nga edad, isa ka security guard kag residente sang Brgy. Kusan Banga, South Cotabato kun diin nagpadulong suno pa ini sa ginadayunan sang iya utod sakay sang iya nga motorsiko nga may plaka nga LO6301 sang hinali ini nga ginbalabagan sang riding-in-tandem nga nakasakay sa bajaj motorsiklo.
Nahibaluan nga wala makilala ang mga suspek bangud natabunan ang nawong sang mga ini.
Nakaangkon naman sang 6 ka igo sang bala sa nagkalain-lain nga parte sang iya lawas ang biktima nga gintunaan sang iya nga kamatayon.
Nahibaluan nga sini nga bulan sang Enero 2018, ini ang pinakauna nga insidente sang pag-atake sang riding-in-tandem sa siyudad apang ikaanum na nga insidente humalin sang bulan sang Disyembre 2017.
Sa subong, ginahibalo pa ang identity sang mga suspek kag kun may kaangtanan ini sa serye sang pagpangluthang sa siyudad antes pa man ang bag-ong tuig.
