Ginkwestyon ni House prosecution spokesperson kag Kabataan Party-list Rep. Renee Louise Co ang pagdumala ni Vice President Sara Duterte sa confidential funds, nga suno sa iya daw “kwarta anay antes plano.”
Suno kay Co, nagguwa sa impeachment trial ang mga pamangkot bahin sa physical kag financial plans sang Office of the Vice President (OVP), lakip ang ginapahayag nga pareho-pareho kag indi klaro nga mga detalye sa mga dokumento.
Sa testimonya ni OVP Assistant Secretary Lemuel Ortonio, ginpahayag niya nga wala sang confidential fund ang OVP sang nagsugod si Duterte bilang vice president sang Hulyo 2022.
Apang wala pa magligad ang duha ka bulan, nagpangayo ini sang P250 milyon sa Department of Budget and Management (DBM).
Nagpagwa ang DBM sang P125 milyon para sa katapusan nga quarter sang 2022. Sang 2023, nakabaton pa ang OVP sang tatlo ka tig-P125 milyon, nga nagresulta sa kabug-usan nga P500 milyon nga confidential funds para sa amo nga tion.
Para kay Co, dapat may klaro anay nga plano antes gamiton ang kwarta sang publiko, upod ang husto nga accounting agud matukiban kun diin napadulong ang pondo.
Ginpabutyag man ni Co nga may gahum ang Senate impeachment court nga magpangayo sang dugang nga mga dokumento kon kinahanglanon agud maid-id nga masusi ang isyu.
