Bumwelta si Davao City 1st District Rep. Paolo “Pulong” Duterte kay private prosecutor Atty. Lorna Kapunan matapos ini mag-angot sang pamilya Duterte sa pagpangluthang sa Ateneo de Zamboanga University (AdZU) sang Agosto 18.
Sa isa ka pahayag, gin-istorya ni Atty. Kapunan ang alegasyon bahin sa posible nga pagkuha sang mga assassin sa balor nga P5,000 kag ginpamangkot kun nangin bahin na bala sang kultura sang pungsod ang pagpintas.
Bangud sini, sa iya Facebook post sang Agosto 19, ginpangabay ni Paolo Duterte si Kapunan nga untatan ang iya ginatawag nga pagpalapta sang mga pahayag batok sa iya pamilya.
Ginapahayag sang kongresista, “Tama na ang pagaka-Marites sang impeachment.”
Ginpabutyag man niya nga indi dapat gamiton ang pagpangluthang sa AdZU agud isulod liwat ang mga alegasyon batok sa pamilya Duterte.
Suno sa iya, isa ini ka krimen nga kinahanglan imbestigahan kag mapanabat ang mga responsable, kag indi dapat himuon nga bahin sang impeachment propaganda.
Ginpahayag man ni Duterte nga katungdanan sang mga abogado ang pagpresentar sang ebidensya kag indi pagpangita sang bag-o nga isyu sa tagsa ka trahedya.
Ginpakamalaot man niya ang Akbayan Party-list bangud sa mga pahayag sini batok kay Vice President Sara Duterte kag sa panawagan nga padasigon ang impeachment trial sini sa Senado.
