Ginatinguhaan sang Department of Agriculture (DA) nga mapalig-on liwat ang proteksyon sa lokal nga industriya sang pagpangaboy paagi sa panukala nga ibalik ang 40% nga taripa sa imported nga karne sang baboy kag magpatuman sang duha ka bulan nga import holiday.
Ini nga tikang ginatuyo nga mabuligan ang lokal nga mga magbababoy nga apektado sang padayon nga pagnubo sang presyo sang ila mga baboy sa farmgate.
Nagluntad man ang mga protesta sa guwa sang panguna nga opisina sang ahensya bangud sa sitwasyon nga ginapangatubang sang mga lokal nga prodyuser.
Suno kay Agriculture Secretary Francisco Tiu Laurel Jr., indi makatarunganon nga ang lokal nga mga magbababoy lamang ang magpas-an sang padayon nga kaperdihan bangud sa manubo nga presyo sang ila mga produkto.
Ginpahayag man sang DA nga nagapangita ini sang paagi agud maprotektahan ang lokal nga industriya batok sa indi patas nga kompetisyon halin sa mga imported nga produkto.
Apang, gin-athag sang ahensya nga panukala pa lamang ang pagbalik sang 40% nga taripa kag ang duha ka bulan nga pag-untat sang importasyon sang baboy.
Kinahanglan pa ini sang dugang nga pag-usisa kag aksyon halin sa iban nga ahensya sang gobyerno, lakip na ang Tariff Commission, antes ini mahimo nga ipatuman.
