KORONADAL CITY – Nadakpan sang mga otoridad ang isa ka drug suspect nga ginakabig rank 9 high value individual (HVI) sang PDEA matapos nag-kagat sa ginlatag nga drug buy-bust sang PNP-PDEA sa Brgy. Morales, Koronadal City, South Cotabato.
Ginkilala ni Koronadal City Police chief PLtCol Hoover Antonio, ang nadakpan nga suspek nga si alyas “Bonbon”, 41 anyos, wala sang asawa, kag residente sang nasambit nga lugar.
Sandig sa report, gindakop ang suspek sang Koronadal City Police Station kag PDEA South Cotabato kaupod ang iban pa nga operatiba sang South Cotabato Police Provincial Office, kag HPG South Cotabato.
Nakuha sa suspek ang isa ka plastic sachet nga may unod nga shabu, isa ka genuine One Thousand Peso nga gingamit bilang buy-bust money, kag boodle marked money.
Sa karon, nakakustodiya na ang mga suspek kag natalana pasakaan sang kaso nga paglapas sa Republic Act No. 9165 ukon ang Comprehensive Dangerous Drugs Act of 2002.
