Naglab-ot sa 325 ka tawo ang gin-aresto sang kapulisan sa London matapos magpartisipar sa isa ka demonstrasyon bilang suporta sa Palestine Action, isa ka grupo nga ginadumilian na sa idalom sang anti-terrorism law sang United Kingdom.
Natabo ang protesta sang Sabado sa guwa sang United States Embassy sa Nine Elms, diin nagtipon ang ginatos nga demonstrador nga nagbitbit sang mga plakard bilang pagpahayag sang suporta sa Palestine Action kag pagsupak sa ginapatihan nila nga genocide sa Palestine.
Suno sa Metropolitan Police, 320 sa mga nadakpan ang ginapasakaan sang suspetsa nga naglapas sa Terrorism Act bangud sa pagpahayag sang suporta sa isa ka organisasyon nga ginadumilian sang gobyerno sang UK.
Bangud sini, naglab-ot na sa kapin 4,000 ang kabug-usan nga kadamuon sang mga aresto nga may kaangtanan sa Palestine Action halin sang gin-deklarar nga ilegal ang grupo sang Hulyo 2025.
Samtang, ginalauman nga talakayon sang UK Supreme Court ang apela batok sa desisyon nga pagbawal sa nasambit nga organisasyon.
Ginpakamalaut naman sang pila ka human rights organizations ang mga pag-aresto kag ginpabug-atan ang importansya sang pagpanalipod sa kahilwayan sa pagpahayag sang opinyon kag katungod sang mga pumuluyo nga magpatigayon sang malinong nga protesta.
