Ginmanduan ni Koronadal City Mayor Erlinda Araquil ang mga barangay officials nga unahon sa rice distribution ang poorest of the poor, ilabi na ang mga pumuluyo nga wala pa nakabaton sang iban nga government assistance.
Sa interview sang Bombo Radyo Koronadal kay Mayor Araquil, iya ginpabutyag nga wala na gin-prioritize ukon ginlakip sa listahan ang mga benepisyaryo sang 4Ps, AICS, Walang Gutom Program kag Sustainable Livelihood Program (SLP) agud mahatagan sang kahigayunan ang iban nga wala pa nakabaton sang ayuda.
Suno sa alklade, naglab-ot sa masobra P10 milyon ang balor sang 15,384 ka sako sang bugas nga ginpanagtag sa mga napili nga benepisyaryo sa syudad, halin sa national government.
Samtang, may 10 kilos ang tagsa ka sako, ukon kabug-usan nga 153,840 kilos nga bugas.
Ginumpisahan na ang distribution sa mga barangay matapos ma-finalize ang pagbaton sang rice allocation, nga ginbahin-bahin base sa population sang kada barangay.
Lakip sa may pinakadako nga allocation ang Santa Cruz nga may 1,283 ka sako, General Paulino Santos nga 1,193, kag Santo Niño nga 1,106 ka sako.
Ginpahayag ni Araquil nga limitado ang allocation kumpara sa populasyon sang syudad, gani nagapangabay siya sang second round ukon dugang nga rice allocation agud mas madamo pa nga pumuluyo ang mabuligan.
