Naglabas ang Philippine Institute of Volcanology and Seismology (PHIVOLCS) ng camera footage na nagpapakita ng pag-agos ng lava mula sa summit crater ng Bulkang Mayon na nagresulta sa collapse-fed pyroclastic density current (PDC) nitong umaga.
Ayon sa PHIVOLCS, naganap ang insidente sa pagitan ng 6:31 a.m. at 6:46 a.m., kung saan bumagsak ang maiinit na abo, bato, at volcanic gas mula sa bulkan. Ang ganitong uri ng PDC ay itinuturing na isa sa pinakamapanganib na volcanic hazards dahil sa bilis at matinding init nito.
Nanatiling nasa Alert Level 3 ang Bulkang Mayon, na nangangahulugang nagpapatuloy ang magmatic unrest at may posibilidad ng mas mapanganib na aktibidad. Dahil dito, mahigpit pa ring ipinagbabawal ang pagpasok sa loob ng 6-kilometrong Permanent Danger Zone (PDZ).
Sa nakalipas na 24 oras, nakapagtala ang PHIVOLCS ng 92 volcanic earthquakes, 299 rockfall signals, at tuloy-tuloy na lava effusion sa Basud, Bonga, at Mi-isi gullies.
Iniulat din ng ahensiya na umabot sa 5,842 tonelada ang sulfur dioxide emissions ng bulkan noong Hulyo 12. Mas mataas pa rito ang naitala noong Hulyo 11, nang umabot sa 13,128 metric tons kada araw ang ibinugang sulfur dioxide—ang pinakamataas sa nakalipas na 26 na taon at halos katumbas ng antas bago ang eksplosibong pagputok ng Mayon noong 2000.
Binigyang-diin ng PHIVOLCS na ang labis na mataas na sulfur dioxide emissions ay maaaring indikasyon ng nalalapit na mas eksplosibong yugto ng aktibidad ng bulkan.
Dahil dito, muling pinaalalahanan ang publiko na umiwas sa Permanent Danger Zone at maging handa sa mga posibleng panganib tulad ng pyroclastic density currents, lava flows, rockfalls, landslides, ballistic fragments, at lahar, lalo na sa panahon ng malalakas na pag-ulan.
