Nagapadayon sa subong ang ginahimo nga rescue kag retrieval operations sa nagkalain-lain nga lugar sa western Colombia matapos magluntad ang mabaskog nga magnitude 7.4 nga linog sang Agosto 10. Ini ang nangin pahayag ni Jayrome Nuñez, Bombo International News Correspondent sa Colombia.
Base sa pinakabag-o nga mga report, 254 na ka tawo ang kumpirmado nga napatay, samtang padayon pa ang assessment sang mga awtoridad sa aktwal nga kalaparon sang danyos. Madamo man ang napagkit nga pilason kag may mga tawo pa nga ginapangita sa idalom sang mga nagkalumpag nga building kag iban pa nga mga estruktura.
Sa mga lugar nga pinakatuman ang epekto, nagapangita ang mga rescue worker gamit ang heavy equipments kag mano-mano nga pagkutkut agud maluwas ang mga posible nga yara pa sa idalom sang rubble. Nagapadayon man ang operasyon sa Cali, Pereira, Manizales, Quibdó kag iban pa nga komunidad sa western Colombia. May mga report man sang mga survivor nga naluwas halin sa nagkalumpag nga mga building.
Nangin mabudlay man ang rescue operations ang mga komunidad sa Chocó, nga malapit sa epicenter sang linog. Sa pila ka malayo kag rural nga lugar, apektado ang suplay sang kuryente kag basic services, samtang problema man ang komunikasyon kag pag-access sang rescue teams sa pila ka komunidad.
Samtang, nagapadayon ang pag-monitor sa mga aftershocks, nga nagadugang sa kabalaka sang mga residente kag nagapabudlay sa pagtrabaho sang mga rescue team sa mga building nga posible pa magkalumpag.Suno sa mga report, nagapadayon ang pag-abot sang international assistance, lakip ang ayuda sang Estados Unidos para sa emergency shelter, pagkaon, proteksyon kag damage assessment.
