Nagtipon ang nilibo nga mga residente sa sentro sang Prague, Czech Republic agud magpabutyag sang pagpamatok sa plano sang gobyerno nga untatan ang monthly licence fee kag kuhaon na sa national budget ang pondo para sa public television kag radio.
Nabalaka ang mga kritiko nga mahimo ini magresulta sa pagpanghilabot sang mga politiko sa editorial independence kag kahilwayan sang media.
Apang ginpabutyag ni Prime Minister Andrej Babis nga wala sang intensyon ang iya administrasyon nga kontrolon ang public media, kundi handum lamang nga bag-uhon ang sistema sang pagpondo nga suno sa iya, indi na angay sa presente nga panahon.
Ang demonstrasyon gin-organisar sang Million Moments for Democracy, nga nagabulubanta nga nag-abot sa 400,000 ang mga nagpartisipar.
Sa idalom sang kasamtangan nga sistema, nagabayad ang tagsa ka panimalay sang 205 Czech crowns ukon mga $9.44 kada bulan para sa public television kag radio.
Suno sa report, mahimo magresulta sa 15 porsyento nga pagnubo sang pondo sang Czech Television kag Czech Radio ang ginproponer nga pagbag-o.
Gin-aprubahan na sang parliament ang una nga draft sang proposal, samtang nagapadayon ang pagpanghangkat sang publiko bangud sa kahadlok nga mahimo maapektuhan ang kahilwayan kag independensya sang media sa pungsod.












