KORONADAL CITY- Nagpangayo sang bulig sa Bombo Radyo Koronadal ang pamilya sang isa ka Overseas Filipino Worker ukon OFW nga nagatrabaho sa Dammam, Saudi Arabia makaligad maka-angkon ini sang balatian.
Sa esklusibo nga interbyu sang Bombo Radyo kay Ivy Betty, luyag sini nga may mag-atipan sa iya nga bana nga si Larry Betty, 50-anyos, residente sang M. Roxas, Sto. Niño, South Cotabato, isa ka plumber sang Moda Company kag 5 na ka tuig sa Saudi makaligad nga maka-angkon sang balatian nga mengingitis.
Suno kay Mrs Betty, Agosto 30,2019 ang ulihi nila nga pagpakig-angot sa iya nga bana kag tuman na suno ini ka niwang samtang nakaconfine sa Dammam Medical Complex.
Halos 2 ka semana man ini nga nagtinir sa clinic sang ila nga kumbuyuhan antes gintransfer sa nasambit nga ospital.
Ginpahayag man sini nga ini na ang ika-2 na ka bes nga naadmit ang iya nga bana kun sa diin naumpawan ini sa una nga pag-atake sang Disyembre kag naliwat naman suno pa sang bulan sang Hulyo.
Wala man suno pa ginpasugtan sang supervisor ni Larry ang kasubong sini nga OFW nga magbantay sa iya sa hospital kag bangud sini, tuman nga ginakabalak-an sang pamilya ilabi na nga naka-angkon pa sang operasyon sa ulo sang biktima kag wala sang may naga-atipan kay Larry.
Masubo man suno pa kay wala na sang trabaho ang biktima makaligad nga ginapahalin sang iya nga supervisor.
Sa karon, panawagan man nila sa gobyerno nga kun masarangan na sang lawas ni Larry, ini ang tigayon nga makapauli sa Pilipinas.
