Nagapadayon ang pagpatuman sang mga regulasyon sa trapiko sa syudad sang Koronadal kasunod sang pagsita sa mga colorum nga mga traysikol.
Sa exclusive interview sang Bombo Radyo Koronadal, ginpahayag ni City Traffic Head Joy Placer nga mas ginapabaskog sang ila opisina ang pagmonitor sa mga salakyan kag drivers agud masiguro nga nasunod ang mga ordinansa kag mga patakaran sa transportasyon.
Suno kay Placer, ginpatigayon ang mga operasyon batok sa mga colorum nga mga traysikol agud maproteheran man ang mga lehitimo nga franchise holders kag mga pasahero.
Sa pihak nga bahin, ginpahayag man niya nga mga memorandum halin sa national agencies partikular sa Department of Transportation (DOTr) kag sa Land Transportation Office (LTO) nga nagaimplementar sang mas istrikto nga polisiya may kaangtanan sa violations kag renewal sang driver’s licenses.
Ginapahug-tan man sang City Traffic Management Division ang seguridad sang publiko, ilabi na sa mga commuters kag tricycle passengers.
Bangud sini, nagpanawagan si Placer sang mas hugot nga bulig kag kooperasyon halin sa mga organisado nga grupo sang tricycle drivers pinaagi sa pag-upod sang disiplina, penalties, kag suspensions sa ila internal rules ukon bylaws agud mapatuman ang maayo kag responsable nga serbisyo sa publiko.
