KORONADAL CITY – Nagahingyo sa publiko ang pamilya sang isa ka tuig nga bata nga babaye nga nabungguan-patay sa bahin sang Waling-waling St., atubangan lamang sang Rizal Park sakop sang Brgy. Zone 4, Koronadal City sang Biyernes sang aga, Hunyo 24, 2022, nga hangpon ang ila nga sitwasyon nga yara sa kasubo.
Sa pagpakig-angot sang pamilya sa Bombo Radyo, nagahingyo ang mga ini nga indi kuntani pag-husgaran sang publiko ang iloy sang biktima bangud wala sang sin-u-man nga Nanay nga luyag matabo ang kasubong nga insidente sa pinalangga sini nga bata.
Nagalaum man sila nga indi na magpaguwa sang mga negatibo nga komento ang netizen kag ang publiko bangud yara sa kalisod kag kasakit ang pamilya sa subong ilabi na nga in-trauma kag injured man ang Nanay sang bata bangud sa pagtinguha nga maluwas ang bata sini.
Madumduman nga aksidente nga nabungguan sang Strada pick-up ang bata nga babaye samtang nagabakal sang bulak ang iloy sini sa isa ka flower shop atubangan sang Rizal Park, Biyernes sang aga.
Sa interview sang Bombo Radyo Koronadal kay PMSG Gandy Basan, investigator sang City Traffic, ginpahayag sini nga boluntaryo nga nagsungka ang suspek Melvin Apenton, 51 years old, isa ka manunudlo kag residente ng Barangay San Jose, Koronadal City.
Suno kay Basan, nagikan sa simbahan si Apenton kag naghapit lamang sa lugar agud nga magbakal man sang bulak kag wala sini ginalauman nga maglountad ang aksidente.
Makita man sa kuha nga video sang isa ka netizen ang pagtumbo-tumbo sang driver matapos magpanaug sa salakyan bangud wala ini nagdahum nga may bata siya nga nabungguan kag nalapakan.
Sa subong, nagapabilin sa kustodiya sang kapulisan ang driver kag natalana nga magaatubangay sila sang pamilya sa Lunes nga adlaw.
Ginarespeto man suno pa sang kapulisan ang desisyon sang pamilya nga hikutaron anay ang haya sang bata antes ang pagpakig-istorya sa suspek kag kun ano man ang ila mangin desisyon.
Sa tion nga magdesisyon nga magpasaka sang kaso, mahimo nga magapangatubang sang kaso nga reckless imprudence resulting to homicide ang driver sang salakyan nga si Apenton.
