Nagalab-ot sa 153 ka tawo ang napatay sa drone strike nga nag-igo sa isa ka merkado sa Abyei, Africa, isa ka teritoryo nga yara sa dulunan sang Sudan kag South Sudan nga ginaangkon sang duha ka pungsod.
Suno sa mga awtoridad, nag-igo ang drone sa malapit nga bodega sang gatong, nga nangin kabangdanan sang sunog sa lugar sang Amiet Market sa north nga bahin sang Abyei.//Gintudlo ni Yohanna Akol Ngor, caretaker information minister sang Abyei administration, ang militar sang Sudan bilang responsable sa pag-atake.
Apang, suno sa isa ka mataas nga opisyal sang militar sang Sudan, ang mga napatay amo ang mga miyembro sang Rapid Support Forces (RSF) kag mga indibidwal nga may kaangtanan sa pagpalusot sang gatong. Ginpahayag man sini nga indi tuyo sang militar nga maigo ang mga sibilyan.
Dugang pa sang mga awtoridad, kapin 20 ka tawo ang nasamaran sa insidente, lakip ang mga yara sa kritikal nga kondisyon nga gindala sa Ameth Bek Hospital para sa pagbulong.
Samtang, ginbasol man sang South Sudan Foreign Ministry ang militar sang Sudan sa pag-atake, nga suno sa ila nag-igo sa madamo nga lugar malapit sa merkado, nga nagresulta sa pagkamatay sang mga sibilyan kag pagkaguba sang mga imprastraktura.
Bangud sini, ginpatawag sang South Sudan ang ambassador sang Sudan agud ipabutyag ang ila pagsupak sa insidente.
Gin-agda man nila ang Sudan nga likawan ang mga tikang nga mahimo magbutang sa peligro sa kabuhi kag propiedad sang mga sibilyan, kag sulbaron ang mga isyu nga may kaangtanan sa Abyei paagi sa diplomasya kag malinong nga pag-istoryahanay
