Nagpahayag sang kasubo si Koronadal City SK Federation President Charles Ronn Trinidad sa pagkaulamid ni SK Chairperson sang Barangay Topland nga si Mheco Caday sa City Drug Enforcement Unit (CDEU) sang Miyerkules nga adlaw, Oktubre 21.
Suno kay Trinidad magapangatubang ang nasambit nga SK Chairperson sa ginapahayag nga illegal drugs-related nga kaso, apang ginpanawagan niya ang publiko nga respetuhon ang due process kag indi pag-generalize ang tanan nga SK officials.
Sa interview sang Bombo Radyo Koronadal, ginpahayag ni Trinidad nga ginapaabot nga mangin maayo nga ehemplo sa mga pamatan-on ang mga lider sang kabataan, gani importante nga mapabilin ang ila integridad kag responsibilidad sa pagpamuno.
Ginpahayag man niya nga ang SK sang Barangay Topland isa sa mga nagpakita sang maayo nga performance sa SK-GEMS assessment ukon Governance Exemplars for Meaningful Service for Sangguniang Kabataan.
Samtang, si Caday nag-file sang leave of absence nga gin-aprobahan sang alkalde, gani ang first kagawad sang SK ang temporaryo nga nagaserbe bilang officer-in-charge. Ginpaathag ni Trinidad nga ang leave of absence indi awtomatiko nga nagakahulugan sang pagpahalin sa puwesto, bangud ang suspension ukon removal kinahanglan magsunod sa legal kag administratibo nga proseso.
Gani, ginpahayag niya nga dapat hulaton ang resulta sang imbestigasyon antes maghimo sang konklusyon, samtang padayon nga ginapalig-on sang SK Federation ang ethical nga pagpamuno kag pagserbisyo sang mga lider sang mga kabataan-onan.
