KORONADAL CITY – Ginatutukan karon sang kapulisan sa siyudad sang Koronadal ang pagsalakay sang “Akyat bahay” matapos nga nabiktima sang pagpangawat ang JY Archers Games and Entertainment Corporation sa Gensan Drive, Brgy. Zone 3, Koronadal City.
Sa interview sang Bombo Radyo Koronadal kay Police LtCol. Hoover Tapang Antonio, COP Koronadal City PNP, indi dapat nga magkumpiyansa ang tanan subong nga tion labi na nga nagapangita lamang sang tsansa ang mga kawatan nga makapangawat.
Suno pa kay Antonio, nakit-an sa CCTV footage nga natabo ang pagpangawat alas-11:30pm- 12:00pm sang tungang gab-i kun diin nagakatulog ang galos kadam-an.
Nahibaluan nga yara sa P160,000 nga kantidad sang kwarta, 2 ka cellphone, kag ang armas sang security guard ang nakuha sa nasambit nga establishemento.
Sa karon, padayon gihapon ang imbestigasyon sa pagkilala sang mga suspek kag kung may kaangot ini sa iban pa nga mga pagpangawat.
Nagapanawagan man ang mga otoridad sa katawhan nga maghalong kag siguraduhon nga sarado ang mga panimalay kag establisyemento agud nga indi mabiktima sang mga kawatan.
