Aprubado na sang Senate Subcommittee on Local Government ang hagna nga nagatuyo nga i-atras ang Barangay kag Sangguniang Kabataan Elections (BSKE) nga natalana sa November 2 kag himuon nga lima ka tuig ang termino sang mga opisyal sang BSK. Suno kay Senator Chiz Escudero, Chairman sang subcommittee, nga sa sulod sang semana nga ini, isumiter niya sa plenaryo ang committee report para gilayon na ini nga madebatehan.
Ginpahayag ni Escudero nga katuyuan man sang Senate Bill 2387 nga kaayuhon ang pagpatigayon sang dungan nga eleksyon para indi na maliwat ang cycle sang liwat-liwat nga pagsuspinde diri sang Kongreso kag para man malikawan ang pag-overlap ukon pagdungan sini sa national kag local elections sa sulod sang isa ka tuig.Sa Facebook post, ginpahayag ni Senator Imee Marcos ang kalipay nga posible indi madayon ang BSKE sa November nga suno sa iya, sang 2024 pa niya ginahambal.
Nagalaum naman si COMELEC Chairman George Erwin Garcia nga magadesisyon diri ang Kongreso sa labing madali nga panahon bangud natalana na sa Septyembre ang filing sang certificate of candidacy (COC) para sa BSKE.
