Nagapanawagan ang MASIPAG Mindanao sa lokal kag nasyonal nga gobyerno nga magpatuman sang floor price kag mas malawig nga suspension sang importasyon sang baboy bangud sa padayon nga pagnubo sang presyo sang lokal nga liveweight nga baboy.
Sa interview sang Bombo Radyo Koronadal, ginpahayag ni Kenneth Cagula, Advocacy Officer sang MASIPAG Mindanao, nga naganubo sa ₱105 tubtob ₱120 kada kilo ang presyo sang buhi nga baboy sa syudad sang Koronadal, kag may report nga nagalab-ot na lamang sa ₱90 kada kilo.
Gani, ginaduso sang mga hog raiser ang minimum nga presyo nga ₱172 tubtob ₱180 kada kilo agud mabuligan sila nga mabawi ang kapital. Ginpahayag man ni Cagula nga nagsaka ang pork imports halin sa 610 milyones ka kilo sang 2023, sa 774 milyones sang 2024, kag 891 milyones sang 2025.
Suno sa iya, indi bastante ang ginapaabot nga 60-day import freeze sang Department of Agriculture, gani ginapanawagan sang mga hog raiser ang apat ka bulan nga suspension sang importasyon kag gilayon nga pinansyal nga bulig.
Ginduso man niya ang pagpagwa sang executive order sang lokal nga gobyerno para sa floor price, agud maprotektahan ang lokal nga producer kag mapalig-on ang industriya sang baboy sa probinsya sang South Cotabato kag sa bug-os nga pungsod.
