KORONADAL CITY – Nahadlok na ang mga Overseas Filipino Workers (OFW’s) sa pungsod Qatar bangud sa 24 oras nga ultimatum nga ginhatag sang Saudi Arabia nga nagamandy nga sundon sang gobyerno sang Qatar ang 10 ka kondisyon nga ginplastar sang mga ini agud indi madayon ang giyera.
Sa ginpalab-ot nga impormasyon ni Bombo International Correspondent Gloridyl Aperocho Juriana, naghatag na sang signal ang hari sang Qatar nga magpreparar sa posible nga giyera nga matabo.
Kadungan sini makita na sa dalanon sang nasambit nga pungsod ang mga tangke, mga suldado kag halos wala sang nagaguwa na sa ila puluy-an ukon ginatrabahuan.
Suno pa kay Juriana, mangin sila ang nakapang-impake na suno man sa mandu sang ila nga employer bangud anuman nga oras mahimo sila nga magbakwit sa tion nga magsugod na ang giyera.
Ginlaygayan man sila sang ila nga employer nga mangin kampante lamang kag indi mahadlok apang nahibaluan niya nga nabalaka man sa ila nga kaluwasan ang mga ini.
Sa subong, nagalaum kag nagapangamuyo sila nga indi madayon ang giyera bangud mangin apektado ang ila nga trabaho kag seguridad.
Nahibaluan nga ginadumilian nga magpainterview ukon magpaguwa sang mga impormasyon ang mga OFW’s sa nasambit nga pungsod suno man sa kamanduan sang gobyerno sang Qatar.
