KORONADAL CITY – Nagasinggitan sa karon sang hustisya ang pamilya sang isa ka Overseas Filipino Worker (OFW) nga taga siyudad sang Cotabato nga napatay sa Riyadh, Saudi Arabia.
Ginkilala ang biktima nga si Juvilyn Masandil, 24 anyos kag residente sang ND Village, RH 10, Cotabato City.
Sa Exclusive interview sang Bombo Radyo Koronadal kay Vincent Masandil, utod sang biktima, tuig 2019 sang nagbiya ang iya nga utod padulong sa Saudi agud magtrabaho nga Domestic Helper.
Bangud sa kapigaduhon kag handum nga makaeskwela, nagdesisyon ang iya utod nga mag-abroad agud nga makatipon sang kwarta kag mapaeskwela man ang mga utod sini.
Apang, pila pa lamang ka bulan nga yara sa Riyadh si Juvilyn indi na daw ini maistorya sang maayo sang iya mga utod bangud kasubong nga nadula ini sa iya husto nga huna-huna.
Tubtob nga nareport na lamang nga missing bangud indi na nila makontak.
Kag sini lamang nga semana sang ila nahibaluan kag nakumpirmar nga masobra 2 ka tuig na gali ini nga napatay kag nakapreso ang employer sini.
Emosyunal naman nga ginsaysay ni Vincent nga makapila ka beses sila nga nangayo sang bulig sa Agency ni Juvilyn apang wala sila ginbuligan kag ginsugiran sang matuod nga natabo sa iya.
Nagahilibion man ini nga nagsaysay sang iya damgo angot sa iya utod nga yara na sa sulod sang kahon.
Sa karon, yara sa metro manila ang ila nga iloy agud asikasuhon ang pagpasaka sang kaso sa Agency kag sa employer ni Juvilyn.
Indi pa man mahibaluan sang pamilya kun makapauli pa sa Pilipinas ang bangkay sini bangud masobra 2 ka tuig na ini nga napatay.
