Nagapabilin nga temporaryo nga indi maagyan ang natiphag nga bahin sang dalan sa Channel 3 sa Purok Kaugnayan, Barangay GPS, Koronadal City bangud sang peligro sa mga motorista kag pumuluyo.
Sa interview sang Bombo Radyo Koronadal kay Engineer Ruel Tianchon sang City Engineering Office, iya ginpahayag nga nagpadala na sang crawler backhoe agud mahatagan sang temporaryo nga solusyon ang lugar kag maabri liwat ang agos sang tubig pakadto sa Marbel River, nga makabulig sa paglikaw sang risgo sang dugang nga pagbaha.
Suno kay City Engineer Ruel Tianchon, kinahanglan ang crawler backhoe bangud indi na masarangan sang ordinaryo nga wheel-type backhoe ang pagpatadlong sang nagailig nga tubig sa apektado nga bahin sang channel.
Ginpahayag man niya nga ang Channel 3 kabahin sang Master Drainage System Plan sang DPWH nga nagaserbisyo sa 21 square kilometers nga urban area sang Koronadal City, apang mga 20 porsyento pa lamang sang proyekto ang natuman bangud sang kakulangan sang pondo sa nagligad nga duha ka tuig.
Bangud sini, ginpasaka na sang City Government kag Barangay GPS ang ila concern sa DPWH, kag ginapaabot nga masugdan ang permanente nga rehabilitasyon sang Channel 3 sa tuig 2027.
Samtang, ginalauman naman nga kun matapos ang temporaryo nga earth canal kag mabalik ang normal nga ilig sang tubig, posible man nga makay-o ang apektado nga dalan samtang ginahulat ang permanente nga proyekto.
Bangud sini, nagpanawagan ang City Engineering Office sa publiko nga magbinuligay sa pagmintinar sang kalimpyo sang mga drainage kag kanal bangud ang nagatipon nga basura isa sa mga nagadugang sa problema sang pagbaha sa siyudad.
