Wala sang pagnubo sa numero sang mga nagapa-rehistro para sa Barangay kag Sangguniang Kabataan Elections (BSKE) bisan pa nga ginapaabot nga pirmahan ni Presidente Ferdinand Marcos Jr. sa Agosto 12 ang layi nga magapaliban sang eleksyon, suno sa Commission on Elections (COMELEC).
Suno kay COMELEC Chairman George Erwin Garcia, padayon ang pagdamo sang mga nagapa-rehistro bisan pa nga 10 ka adlaw lang ang registration period halin Agosto 1 tubtob 10.
Suno sa iya, 73% sang mga aplikante amo ang mga bag-o nga botante, kag kadam-an sa ila mga pamatan-on.
Ginpahanumdom ni Garcia ang publiko nga magapadayon ang preparasyon sang komisyon para sa BSKE samtang nagahulat pa sang pirma sang presidente, kag wala pa sang daku nga pondo nga nagagasto bangud yara pa sa procurement stage ang ahensya.
Sa karon, base sa datos sang COMELEC, lapaw na sa 980,000 ang kabug-osan nga nagpa-rehistro sa bilog nga pungsod.
