Patay ang isa ka indibidwal samtang siyam naman ang pilason matapos marumpag ang dako nga bahin sang chemical treatment system sa isa ka planta sa Longview, Washington.
Lakip sa mga pilason ang walo ka empleyado sang pasilidad isa ka bumbero nga gilayon naman nga nagresponder sa insidente.
Suno sa mga otoridad, gina-alegar nga hinali na lang naguba ang isa ka tangke nga nagaunod sang chemical mixture sa Nippon Dynawave Packaging Co. facility, nga nagtuga sang pagkarumpag kag sunog sa lugar.
Ang nasambit nga tangke ang may kapasidad nga magunod sang tubtob 80,000 gallons sang kemikal, kag ginabulubanta nga yara sa 60 porsiyento pa ang unod sini sang nagluntad ang aksidente.
Madasig man nga natapna sang mga otoridad ang apoy, kag gilayon nga nagpaidalom sa kontrol ang lugar agud malikawan ang mas malapad nga halit.
Ginkumpirmar sang mga awtoridad nga luwas na ang komunidad sa palibot kag wala sang natumod nga pamahog sa ikaayong lawas sang publiko.
Sa karon, padayon pa ang imbestigasyon sa eksakto nga gintunaan sang pagkaguba sang tangke kag sa lapad sang structural failure nga nagtuga sang insidente.
