Nagbutang sang mga kondisyon ang Timor-Leste antes sugtan ang deportasyon sang ginpahalin nga mamalidha nga si Arnie Teves Jr., suno kay National Bureau of Investigation (NBI) Director Jaime Santiago.
Upod sa mga kondisyon amo ang certificate of handover nga nagamando nga dapat tratuhon si Teves sang makatawhan kag indi pag-ipriso masobra sa 40 ka tuig.
Ginpa-athag man sang NBI chief nga sa idalom sang Article 70 sang Revised Penal Code, ginapahamtang sang 3-fold rule ang limitasyon sa kabug-usan nga panahon nga pwede iserbe sang isa ka convict sa prisohan bisan pa madamo ang iya kaso.
Ang 40 ka tuig amo ang maximum nga sentensya nga pwede iya malab-ot bisan ano pa kadamo ukon kabug-at sang mga sentensya.
Ang dugang pa nga kondisyon amo nga indi dapat pasakitan ukon torturon si Teves kag dapat madetain siya sa mga pasilidad nga naga-uyon sa international standards.
Gintumod man nga indi siya dapat hatagan sang sentensya nga kamatayon kag dapat nga may patas kag pampubliko nga paglitis suno sa layi sang Pilipinas.
