KORONADAL CITY – Gindangop sang pamilya Danial halin sa Sitio Saboy, Brgy. Acmonan, Tupi, South Cotabato sa Bombo Radyo Koronadal ang concern angot sa ila apo nga suno pa ginpasal-an sang pila ka mga katapo sang nasambit nga barangay nga suno pa nagpositibo ini sa coronavirus disease 2019.
Suno kay Sarenio Danial, lolo sang bata nga suno pa nga gindala ang apo sini sa banwa sang Surallah agud nga iga isolate bangud sa mga impormasyon nga nagpositibo ini.
Una diri nga gindala ang apo sa Tupi Municipal Hospital bangud nga nagasuka ini kag sagad sang pamuhin, apang naglapta na lang nga nagpositibo sa virus.
Dugang pa sini bangud sa panghilitabo nakaangkon sila sang deskriminasyon halin sa ila nga sitio padulong sa barangay bangud nga ginadumilian sila nga magpalapit sa ila nga barangay hall.
Mangin man suno pa nga gin ulamid pa ang ila nga sitio nga pagasunugon bangud may yara suno pa sang nagpositibo.
Desidido naman ang pamilya Danial nga magsang-at sang kaso bangud sa kahuy-anan kag deskriminasyon nga ila naeksperyensyahan sa ila nga lugar.
Sa subong nakapuli na sa ila panimalay ang bata kag yara sa maayo nga kondisyon
