Magandang balita para sa mga motorista at mamimili dahil ipatutupad ngayong Martes ang malaking rollback sa presyo ng mga produktong petrolyo, ayon sa Department of Energy (DOE).
Sa inilabas na abiso ng ahensya, bababa ng P9.26 kada litro ang diesel, habang P4.76 kada litro naman ang bawas sa gasolina. Pinakamalaki ang rollback sa kerosene na aabot sa P10.86 kada litro.
Ayon kay Sharon Garin, nagsisimula nang bumalik sa mas mababang antas ang presyo ng langis matapos ang mga naunang pagtaas na dulot ng kaguluhan sa pandaigdigang merkado.
Ipinaliwanag ni Garin na humuhupa na ang epekto ng tensyon sa Gitnang Silangan, partikular matapos ang pansamantalang tigil-putukan at muling pagbubukas ng Strait of Hormuz, na dinaraanan ng malaking bahagi ng suplay ng langis sa buong mundo.
Matatandaan na tumaas ang presyo ng krudo matapos ang mga pag-atake ng United States at Israel laban sa Iran noong huling bahagi ng Pebrero, na nagdulot ng pangamba sa suplay ng langis sa pandaigdigang merkado.
Samantala, hindi lahat ng produktong petrolyo ay makikinabang sa rollback dahil inanunsyo rin ng DOE ang P3.41 kada kilong pagtaas sa presyo ng liquefied petroleum gas (LPG).
Batay sa umiiral na presyo sa Metro Manila hanggang Hunyo 1, ang RON 95 gasoline ay nasa P82.90 kada litro, habang ang diesel ay P82.70 kada litro bago ang ipatutupad na bawas-presyo.
Inaasahang magbibigay ng malaking ginhawa ang rollback, lalo na sa mga pampasaherong sasakyan, transport operators at iba pang sektor na lubhang umaasa sa produktong petrolyo sa kanilang araw-araw na operasyon.
