Ginkumpirmar sang Philippine Navy ang natabo nga pagbalabag sang mga barko sang China sa barko sang Pilipinas nga may dala nga pasyente nagikan sa BRP Sierra Madre sa Ayungin Shoal.
Suno kay Philippine Navy Rear Admiral Roy Vincent Trinidad, nagapatigayon sang emergency medical evacuation ang duha ka sakayan sang Philippine Coast Guard (PCG) sang ginbalabagan ang mga ini sang mga barko sang China malapit sa Ayungin Shoal.
Sa pihak sang natabo, madinalag-on naman nga na-evacuate sa Palawan ang pasyente suno kay Trinidad.
Matandaan nga sang nagligad nga bulan, kapareho man nga insidente ang natabo sa amo nga lugar matapos ginbalabagan man sang China Coast Guard (CCG) ang Pilipinas sa pagpatigayon sang medical evacuation sa nagamasakit nga miyembro sang Philippine Navy nga naka istasyon sa BRP Sierra Madre.
