KORONADAL CITY – Nag-alsa si Mayor Leonard Escobillo sang banwa sang Tampakan, South Cotabato makaligad nga ginpauntat suno pa sang Land Transportation and Franchising Regulatory Board (LTFRB) Region 12 ang ila nga ginpatuman nga libre nga sakay para sa mga pasahero bilang sabat sa serye sang oil price hike.
Sa eksklusibo nga interbyu sang Bombo Radyo Koronadal kay Mayor Escobillo, ginpahayag sini nga nakibot siya sa ginpalab-ot sa iya sang mga operator sang L300 Van nga ila nga ginkontratra sa bulig sang isa ka dako nga mining company, matapos nga gintawgan sila ni LTFRB Director Reynato Padua kag ginpaandaman nga indi pag-e-renew sa tion nga magpadayon ini bangud daw sa pila ka bayulasyon.
Nagapati si Escobillo nga indi makatarungan ang ginhimo sang LTFRB bangud maayo suno pa ang tinutuyo sang ila nga libreng sakay para sa tanan nga apektado sang sobra ka taas nga presyo sang produkto nga petrolyo.
Gilayon nga ginpanginwala ni LTFRB Director Reynato Padua ang nasambit nga alegasyon sa interbyu sang Bombo Radyo nakigsapol na ini kay Mayor Escobillo kag naathagan na ang tanan.
Ginpahanugutan naman ang nasambit nga L300 Van gani dayon sa gihapon ang nasambit nga tikang sang LGU-Tampakan.
