Nagpabutyag sang kasubo si Koronadal City Mayor Erlinda “Bing” Araquil sa kontrobersiya nga nagaulamid sa SK chairman sang Barangay Topland, nga nagsurrender sa mga otoridad may kaangtanan sa alegasyon sang pagka-imbolbar sa ilegal nga droga.
Sa interview sang Bombo Radyo Koronadal ginpahayag ni Mayor Araquil, base sa impormasyon halin sa Philippine National Police (PNP), madugay na nga yara sa watch list ang nasambit nga opisyal. Apang, gin-alegar sang iya pamilya nga ang pagsulod sa ila panimalay nga wala sang ginpakita nga search warrant ukon warrant of arrest.
Gin-ako man sang alkalde nga may kinamatarong ang pamilya nga magpangayo sang pagpaathag, ilabi na sa nagpalapta sang laragway sang SK opisyal sa social media kag sa mga alegasyon batok sa iya.
Madumduman nga nagsungka ini sa Koronadal City PNP sang Miyerkules sang udto, Oktubre 21, matapos nga naguwa ang video ang gina-alegar nga iya pagpakigbahin sa pot-session.
Apesar pa sini, ginpabutyag ni Araquil nga ang laye dapat ipatuman nga wala sang piniliay, opisyal man sang gobyerno ukon ordinaryo nga pumuluyo.
Ang bisan sin-o nga mapamatud-an nga naglapas sa layi dapat manabat suno sa nagakaigo nga proseso sang hustisya.
Ginpasalig man niya nga padayon ang kampanya sang gobyerno batok sa ilegal nga droga nga wala nagakaluya sa pagpatuman kag gin-agda ang publiko nga maglikaw sa mga aktibidad nga nagalapas sa laye.
