Nagsungka sa talatapan sang Koronadal City PNP ang isa ka Sangguniang Kabataan ukon SK Chairman matapos nga nadiskubrehan ang ginapahayag nga iya pagpakigbahin sa pot-session.
Sa interview sang Bombo Radyo Koronadal, ginpahayag ni Police Lieutenant Colonel Harold Cornel, Chief of Police sang Koronadal City PNP, nga boluntaryo nga nagsungka ang nasambit nga SK Chairman sang Miyerkules, Oktubre 21, alas diyes sang aga.
Suno kay Cornel, nadiskubrehan ang gina-alegar nga pot-session.
Bangud sini, yara na sa surveillance sang Koronadal City PNP ang nasambit nga SK Chairman kag ginaplano na kuntani nga patigayunan sang kapulisan sang anti-illegal drug operation.
Apang, wala na ini natuloy matapos nga nagsungka ang opisyal sa talatapan sang kapulisan.
Kaupod sang SK Chairman sa pagsungka ang iya live-in partner, utod, kag ang kapitan sang ila nga barangay. Nag-upod man sa ila si Retired Police Executive Master Sergeant Arnel B. Falcis, Deputy Chief for Administration sang City Traffic Management Division ukon CTMD.
Sa karon, wala pa sang dugang nga detalye nga ginpahayag ang kapulisan parte sa resulta sang ila imbestigasyon kag sa posible nga kaso nga pagaatubangon sang nasambit nga SK Chairman.
